ဘုန်းကျော် Group ဖွင့်ပြီ...

Google Groups
Subscribe to phone_kyaw
Email:
Visit this group

6/17/11

ကျေးဇူးကန်းရင် ဘ၀ပျက်တက်တယ်

ဒီအကြောင်းလေးကို ရေးမယ်ဆိုပြီးကြံခဲ့တာ အခုမှရေးဖြစ်ပါတယ်။ တကယ့်အဖြစ်မှန်ပါ။

ပဲပဲ

၈-တန်း၊ ၉-တန်းနှစ်လောက်မှာ တွေ့ခဲ့တဲ့အတွေ့ အကြုံလေးပါ။ ကျနော်တို့ နေခဲ့ဘူးတဲ့ တပ်ထဲက အကြောင်းပေါ့။ ရဲဘော်တွေနေရတဲ့ နေအိမ်လေးတွေကို ခြောက်ခန်းတွဲလို့ခေါ်တယ်။ ပျဉ်ထောင်၊ သွတ်မိုးနဲ့ပါ။ ပျဉ်ထောင်သွပ်မိုးဆိုတာက နာမည်ပဲရှိတယ်။ တခါတလေ ၀ါး တွေပါကူပြီးထောက်ထားရတဲ့အထိ ဆိုးရွားလှတဲ့ ခြောက်ခန်းတွဲလေးပေါ့။

နှစ်ပေါင်း သုံးလေးဆယ်ရှိပြီဆိုတော့ ပျဉ်လဲမထောင်နိုင်တော့ဘူး၊ သွပ်လဲ မမာနိုင်တော့ဘူး။ အကုန်လုံး ပေါက်ပြဲ၊ ချ စားခံရတဲ့ ပျဉ်ထောင်အိမ်ခြောက်ခန်းတွဲအုပ်စုအဖြစ် အသိအမှတ်ပြုပါတယ်။ ခြောက်ခန်းတွဲ လေးခုရဲ့အလည်ခေါင်တည့်တည့်မှာ အုတ်နဲ့ လုပ်ထားတဲ့ရေကန်ရှိတယ်။

သုံးမီတာပတ်လည်လောက်ရှိမယ်။ ဒီရေကန်မှာ စုပေါင်းရေချိုးရေခပ်ကြပေါ့။ ၂၄-နာရီလုံး ရေကအမြဲလာတယ်။ ရေပြည့်လည်း လာနေတာပဲ။ ပိတ်စရာမရှိ၊ ဒီအတိုင်းပစ်ထားတဲ့ရေကန်။ ရေညှိ၊ ရေမှော်၊ အညစ်အကျေးတွေလည်း အပြည့်။ ရေကန်က ရေပိုက်တွေကလည်း ပေါက်တာများလို့ ဖာရာတွေချည်းပဲ။ လမ်းဘေးက ပလတ်စတစ်နဲ့လည်း ကောက်ပြီး ဖာရတာပဲ။ လက်တလောအဆင်ပြေအောင်။ အဲဒိရေကန်က ကျနော်တို့ရဲ့တခုတည်းသော ရေကန်။ ရေချိုးရေခပ်ကြတယ်။ ရေကန်နဲ့ ခြောက်ခန်းတွဲက ၁၀-မီတာလောက်ပဲဝေးတယ်။

ကျနော်တို့အခန်းတွေက အတော်လုံခြုံတယ်။ ဘေးအခန်းက စကားပြောရင်၊ တခြားဘေးအခန်းကကြားရတဲ့အထိ ဒီလောက်လုံခြုံတဲ့အခန်း။ ဒါ့ကြောင့်ရဲဘော်တွေ၊ သူတို့သားသမီးတွေဆိုရင် အတင်းပြောလို့မရဘူး။ အားလုံးကြားနေရတာဆိုတော့။

အခန်းတစ်ခန်းက ဘယ်လိုအခန်းလဲ၊ ဘယ်လောက်ကျယ်လဲဆိုတာကို ရှင်းပြမှရမယ်ထင်တယ်။ ပေ နှစ်ဆယ်ပတ်လည်ရှိတဲ့ အိမ်ရှေ့ခန်း၊ ပေ ၂၀-လောက်ရှိတဲ့ အိပ်ခန်း။ ရှားပါးပါး ဒီနှစ်ခန်းပဲရှိတယ်။ ကိုယ့်ငွေကို ကိုယ်သုံးပြီး ကြိုက်သလိုသာ အခန်းဖွဲ့ နေတော့။ ဒါက ကျနော်တို့ နေခဲ့ဘူးတဲ့ ခြောက်ခန်းတွဲက အခန်းတစ်ခုပေါ့။ ဒု-အရာခံဗိုလ်ကစလို့ တပ်သားအထိ ဒီလိုအခန်းမျိုးမှာနေရတယ်။ အရာရှိတွေကတော့ သီးခြားအိမ်လေးတွေနဲ့ပေါ့။ အရာရှိနဲ့ ရဲဘော်မတူ။ အရာရှိတွေရဲ့ဟိုဟာက ပိုကြီးတယ်ဆိုတော့။ ဒီလိုမျိုးခွဲခြားခံရတယ်။ ထားတော့။ ပြောချင်တာကို ဆက်ပြောပါရစေ။

ကျနော်တို့က ဒါကို လိုင်းခန်းလို့ခေါ်တယ်။ အစွန်ဆုံးအခန်းမှာ ကျနော့်အချစ်တော်ကြီး ပဲပဲဆိုတဲ့ လူရှိတယ်။ သူ့နာမည်အရင်းတော့မဟုတ်ဘူး။ ကျနော်တို့ပတ်ဝန်းကျင်က သူ့ကို ချစ်စနိုးပေးထားတဲ့နာမည်။ သူ့ရဲ့ နာမည်အရင်းကိုလည်း ကျနော်မသိဘူး။ နှစ်ပေါင်း ၁၈-နှစ်လောက် သူနဲ့အတူ နေခဲ့တာတောင် မသိဘူး။ စကားပြောလိုက်ရင် ပဲပဲ ဆိုတဲ့အသံကလွဲရင် ကျန်တဲ့အသံမထွက်ဘူး။ စကားမပြောတက်တဲ့ လူတစ်ယောက်ပေါ့။

သူက အသက် ၃၀-အရွယ်။ လူကောင်ကသေးသေး။ အရပ်က ဗေလုဝ လောက်ပဲရှိမယ်။ အ၀တ်အစားဝတ်ရင် သေသေသပ်သပ်ဝတ်တယ်။ ကျားထိုးကစားတော်တယ်။ သူနဲ့ သူ့အမေ က သူ့ညီမအိမ်မှာ မှီလိုပြီး နေတယ်။ ယောက်ဖက တပ်ကြပ်ကြပ်ကြီး။

ရေကန်ဘေးမှာ သူနေတော့ သူ့ ရဲ့တာဝန်ကို သူသိတယ်။ရေကန်ကို တပတ်တခါသန့်ရှင်းရေးလုပ်ပေးတယ်။ ဘယ်သူမှ သူ့ ကို ခိုင်းတာမဟုတ်ဘူး။ ညနေပိုင်းကျောင်းက ကျနော်ပြန်လာပြီဆိုရင် သူ့ အိမ်ဘေးက ဖြတ်ပြီးမှ ကျနော့်အိမ်ကိုရောက်တယ်။ နေ့တိုင်း ကျနော့်အတွက် ထမင်းရည်ကို ပဲပဲ ကသိမ်းထားပေးတယ်။ ကျနော်ပြန်လာပြီဆိုရင် သူနဲ့ကျနော် ထမင်းရည်အတူတူသောက်ပြီး ကျား ထိုးတယ်။ ကျနော်ပဲ အမြဲရှုံးတယ်။ ကျားထိုးဖော်မရှိလို့ ကျနော့်ကို ဖားတဲ့အနေနဲ့ ထမင်းရည်တိုက်တဲ့သဘော။ ဒီလောက်ထိအောင် သူချမ်းသာတာ။

သူ့ ညီမက အိမ်မှာ အခန့် သား။ ဘာမှမလုပ်။ လေးနှစ်အရွယ် သူ့ သမီးလေးကိုတောင် ကောင်းကောင်းမထိန်းဘူး။ ငအ ဖြစ်တဲ့ ပဲပဲနဲ့  ကျန်းမာရေးချူချာတဲ့ မိခင်အိုကြီးကပဲ ထိန်းကျောင်းတယ်။ ပဲပဲယောက်ဖက တပ်တွင်းရိက္ခာဂိုဒေါင်ကိုင်တယ်။ ဆီကိုင်တဲ့လက် ဆီပေတဲ့ထုံးစံရှိတော့ သူတို့အိမ်လဲ စီးပွားရေးအဆင်ပြေပါတယ်။

တစ်ခါတလေ ပဲပဲက ထမင်းချက်တာ၊ အ၀တ်လျှော်တာ နောက်ကြရင် ပဲပဲကို ညီမဖြစ်သူက ထမင်းမကျွေးဘူး။ ဆဲဆဲဆိုဆိုနဲ့ အမြဲတမ်းဆူပူကြိမ်းမောင်းတယ်။ သူတို့အိမ်မှာ ထမင်းအိုးနှစ်လုံးထားတယ်။ တစ်လုံးက ပဲပဲစားဖို့ ထမင်းအိုး။ နောက်တစ်လုံးက ညီမနဲ့ ယောက်ဖြစ်သူတို့အတွက်။ ပဲပဲအတွက် ဆန်ကတော့ သိတဲ့အတိုင်း၊ တပ်တွင်းကရတဲ့ ငစိန်ဆန်။ သူတို့ကတော့အကောင်းစားပေါ့။ တခါတလေ ပဲပဲလည်း လစ်ရင်လစ်သလို ညီမနဲ့ယောက်ဖဖြစ်သူဆီက ပိုက်ဆံခိုးပြီး စီးကရက်ဝယ်သောက်တယ်။ ကျနော်ကိုလည်း တိုက်တယ်ပေါ့။ ဆေးပေါ့လိပ်ဆိုရင် သူမသောက်။ ဒါက ပဲပဲရဲ့ဘ၀တစ်စိတ်တစ်ပိုင်း။

အောင်မိုး

ကျနော့်ထက် ၁၀-နှစ်လောက်ကြီးတဲ့အောင်မိုးဆိုတဲ့လူလည်း ခြောက်ခန်းတွဲမှာနေတယ်။ အဖေက ရဲဘော်။ အမေက ပဲပြုပ်သည်။ သို့သော်သူတို့ ချမ်းသာတယ်။ ပဲပဲက ငအ။ အောင်မိုးက အကန်း။ မျက်လုံးမမြင်ဘူး။ မမြင်ပေမဲ့အရမ်းသန့် တယ်။ ဘယ်လို သန့်ရှင်းရေးလုပ်လဲတော့မသိဘူး။ တအိမ်လုံးပြောင်နေအောင် တံမျက်စီးလှည်းနိုင်တယ်။ အုတ်ကန်ကနေ အိမ်အထိ ဘယ်သူအကူမှ မပါပဲ ရေခပ်နိုင်တယ်။ အောင်မိုးမမွေးခင်တုန်းက သူတို့မိသားစု အရမ်းဆင်းရဲတယ်။ အောင်မိုးကိုမွေးပြီး သူတို့စီးပွားဖြစ်လာတော့ မျက်လုံးမမြင်တဲ့သူတို့သားကို ကျေးဇူးရှင်လို့ ဆိုပြီး သတ်မှတ်ထားတယ်။

ပဲပဲနဲ့အောင်မိုးက မတည့်အတူနေ။ သူတို့ကြားမှာ ကျနော်ကစကားပြန်။ ပဲပဲ လက်ဟန်ခြေဟန်နဲ့ ပြောတာကို ကျနော်က အောင်မိုးကို ဘာသာပြန်ပေးရတယ်။ အောင်မိုးက မမြင်ဘူးဆိုတော့။ တခါတလေ အောင်မိုးပုဆိုးကိုဆွဲချွတ်ပြီး ပဲပဲလုပ်တာဆိုပြီး ကြပ်ပေးတော့ ပဲပဲနဲ့အောင်မိုးရန်ဖြစ်ကြတာကို ကျနော်က သဘောကြတယ်။

တနေ့တော့ သူတို့နဲ့ ကျနော် မမျှော်လင့်ပဲကွဲသွားခဲ့တယ်။ သူတို့လည်း ဟိုရောက်ဒီရောက်၊ ကျနော်လည်း ဟိုရောက်ဒီရောက် ဘ၀စာမျက်နှာတွေကို တစ်ခုပြီးတစ်ခု လှန်နေရတုန်း။ အခုဆိုရင် ၁၄-နှစ်လောက်ရှိပြီ။ သတိတရရှိလို့ တပ်ထဲက ငယ်သူငယ်ချင်းတွေကို အောင်မိုးနဲ့ပဲပဲအကြောင်းကို ပြန်မေးမိတယ်။ စိတ်မကောင်းစရာလား၊ ၀မ်းသာစရာလားတော့မသိဘူး။

ပဲပဲဆုံးသွားပြီ။ သူ့အမေက သူ့ ထက်အရင်ဆုံးတယ်။ သူ့ အမေမသေခင်မှာ သူ့သားကို စိတ်မချဘူးဆိုပြီး ပြောသွားခဲ့တယ်။ ပဲပဲရဲ့ညီမဖြစ်သူလည်း အိမ်ထောင်ကွဲပီး ဘ၀ပျက်သွားတယ်။

ဒါပေမဲ့ ၀မ်းသာစရာသတင်း ကြားရပြန်တယ်။ အောင်မိုးတို့ မိသားစု ရွှေပေါက်ကန်မြို့သစ်မှာ တိုက်နဲ့ ကားနဲ့ ကြီးပွားနေတယ်တဲ့။ သြော်....ကျေးဇူးသိတက်သူတို့ကြီးပွားပြီး ကျေးဇူးကန်းသူတို့ ဘ၀ပျက်ကုန်ကြတဲ့ လူ့ လောကပါလား။ လောကကြီး တရားပါတယ်။ ဒီလိုပဲဖြစ်သင့်ပါတယ်။

ဒီအကြောင်းနဲ့ယှဉ်ပြီး နိုင်ငံရေးကိုလည်း သတိထားပြီးကြည့်မိတယ်။ ကျေးဇူးကန်းသူများဖြစ်တဲ့ ဦးနေ၀င်းတို့၊ ဦးခင်ညွှတ်တို့ ဘ၀ပျက်ခဲ့ကြပြီ။ နောက်ဘယ်သူတွေများ လောကကြီးရဲ့ဒဏ်ခတ်တာကို ခံရမလဲမသိဘူး။ ဦးသန်းရွှေလား၊ ဦးသိန်းစိန်လား၊။ ဘယ်သူတွေလဲဆိုတာ စောင့်ကြည့်တာပေါ့ဗျာ။ ဇာတ်လမ်းအစရှိရင် ဇာတ်လမ်းအဆုံးတော့ရှိရမယ်။

ကျေးဇူးမဆပ်ရင်နေ ကျေှးဇူးမကန်းကြပါနဲ့။

View My Stats