ကျနော့်ဆရာကြီး ရှေ့ တန်းမှာ နေရာမရပါလား

စီးပွားရေးပညာရှင်ဒေါက်တာမျိုးညွန့် အား စီးပွားရေးဆိုင်ရာဆွေးနွေးပွဲတွင် ယခုလို ရှေ့ တန်းတွင် တွေ့ ရှိရသည်။
The Voice

ABSDF ခေါင်းဆောင်ဟောင်း ကိုမောင်အေးအကြောင်း

"ကျုပ်တို့ တိုင်းပြည် ခြင် ကိုက်တယ်ဗျာ။ လမ်းဘေးတွေမှာလည်း ညစ်ပတ်ပေရည်နေတယ်။ အရမ်းနံတယ်"

ကိုမောင်အေးက သြစတျေးလျနိုင်ငံမှာ ၁၆-နှစ်လောက် နေပြီးတော့ မြန်မာပြည်ကို အလည်သွားခဲ့တယ်။ သမ္မတကြီးက ပြန်လာပါဆိုလို့ သူလည်း ပြန်သွားပါတယ်။ မြန်မာပြည်ပြန်တဲ့အတွေ့ အကြုံကို သူက ကျနော့်ကို ပြောပြနေတာပါ။ သူက ဆက်ပြီး...နေရာတကာ ငွေပေးမှ အလုပ်ဖြစ်တယ်ဗျာ...ဆိုပြီးစိတ်ပျက်တဲ့လေသံနဲ့ လည်းပြောရှာတယ်။

သြစတျေးလျကို ကိုမောင်အေးလာဖို့ အတွက် နယ်စပ်က ဒုက္ခသည်စခန်းထဲမှာ သုံးနှစ်လောက် နေခဲ့ရတယ်။ ရန်ကုန်က ပါလာတဲ့ ငွေလေးတွေနဲ့ မိသားစု ခြိုးခြံချွေတာပြီး စားတယ်။ စခန်းကပေးတဲ့ ရိက္ခာလေးတွေနဲ့ ဆိုတော့ လုံလောက်တယ်။

သြစတျေးလျနိုင်ငံရောက်တော့ အင်္ဂလိပ်စာမတက်တဲ့ ကိုယ်မောင်အေးကို သူငယ်ချင်းတစ်ယောက်က သန့် ရှင်းရေးအလုပ်တစ်ခုရအောင် ဖန်တီးပေးတယ်။ ရန်ကုန်မှာ စက်ရုံအလုပ်သမားအဖြစ်လုပ်ဖူးတဲ့ ကိုမောင်အေးဟာ သန့် ရှင်းရေးလည်း လုပ်နိုင်တယ်။ ဒုက္ခသည်စခန်းမှာ ညစ်ပတ်ပေရည်နေတဲ့ ဘ၀မှာလည်း သူနေဘူးတော့ သန့် ရှင်းရေးအလုပ်ကို သူလုပ်ရတော့ ပျော်ရွှင်နေတယ်။

သူက နိုင်ငံရေးလည်း စိတ်ဝင်စားပါတယ်။ ဒါပေမဲ့ နိုင်ငံရေးတော့ မလုပ်ပါဘူး။ ဘာဖြစ်လို့ လည်းဆိုတော့ နိုင်ငံရေးလုပ်ရင် ထောင်ကျမှာဆိုးလို့ ဆိုပြီး သူရဲ့ ယုံကြည်ချက်ကို ပွင့်ပွင့်လင်းလင်း ပြောရှာတယ်။

"လက်ရှိနိုင်ငံရေးက မဆိုးပါဘူး။ အစိုးရ ကောင်းလာပြီ"

"နေပါအုံး ဘာကောင်းတာလဲ"

"အစိုးရ ကောင်းနေပြီလေ။ ခင်ဗျား မသိဘူးလား"

ကျနော်ပဲ ညံ့လို့ လားမသိဘူး။ ကိုမောင်အေးက ပြန်ပြီးတောင်မေးခွန်းထုတ်သေးတော့ သူကပဲ နိုင်ငံရေးသမားကြီးအထာနဲ့ ။ မျက်နှာပေးကလည်း သြစတျေးလျကို ရောက်ခါစ မျက်နှာပေးမဟုတ်တော့ဘူး။ ခပ်တင်းတင်း ခပ်မာမာ၊ ဘယ်သူမှ လူမထင်တော့ထဲ မျက်နှာပေးဖြစ်သွားတဲ့ ကိုမောင်အေး။ ဒုက္ခသည် စခန်းထဲမှာ နေတုန်းက လူတိုင်းကို မျက်နှာငယ်ငယ်နဲ့ ဖားယားပြီး တောင်းစားခဲ့တဲ့ ကိုမောင်အေးတစ်ယောက် အခုကြတော့ ဒီလိုစကားတွေ ပြောထွက်တာ အံ့သြနေမိတယ်။

သူရန်ကုန်ရောက်တော့ ဈေးအကြီးဆုံးဟော်တယ်မှာ တည်းတဲ့အတွေ့ အကြုံကို ပြောပြသေးတယ်။

"ဟိုတယ်ဆားဗစ်တွေကလည်း ညံ့တယ်ဗျာ။ ဆက်ဆံရေးလည်း မကောင်းဘူး။ အခန်းထဲက အဲယားကွန်းကလည်း နားကိုညီးနေတာပဲ။ ကျနော့်အိမ်လောက်တောင် မကောင်းဘူးဗျာ"

ရန်ကုန်မှာနေတုန်းက သူ့ ရဲ့ အိမ်အကြောင်းကို မိတ်ဆွေတစ်ချို့ ပြောပြတယ်။ ဓနိမိုး၊ ထရံကာနဲ့ သစ်သားပြားတွေခင်းထားတဲ့ အိမ်မှာ ကိုမောင်အေးတို့ မိသားစုနေတယ်။ တစ်လကို ၀င်ငွေလေးငါးသောင်းလောက်တော့ သူ့ ဝင်ငွေရှိတယ်။ မိန်းမက အိမ်ရှေ့ မှာ ကွမ်းယာရောင်းတယ်။ သူနေတဲ့ ရပ်ကွက်ကလည်း အခြေခံလူတန်းစားတွေနေတဲ့ ရပ်ကွက်ဆိုတော့ အမြဲလိုလို ဆူညံပွက်လောရိုက်နေတဲ့ ရပ်ကွက်။ ရေမြောင်းတွေမှာ ခြင်တွေကလည်း ပလူကိုပျံလို့ ။ ဒုက္ခသည်စခန်းထဲက အိမ်နဲ့ သိတ်ပြီးမကွာ။ အဲယားကွန်းနဲ့ တစ်ခါမှမနေဘူးတဲ့ ကိုမောင်အေး။ သြစတျေးလျရောက်မှ အဲယားကွန်း၊ ရေခဲသေတ္တာ၊ တီဗွီကို တွေ့ ဘူး၊ သုံးဘူးတဲ့ ကိုမောင်အေး။ အခုတော့ ရန်ကုန်ကဟိုတယ်ကြီးမှာ တည်းပြီး အဲယားကွန်းမကောင်းဘူး၊ ဆားဗစ်ညံ့တယ်ဆိုတဲ့ စကားကိုတောင် ဂလိုဘယ်လိုက်ဇေးရှင်းနဲ့ အညီ၊ လက်ရှိနိုင်ငံရေးအပြောင်းအလဲနဲ့ အညီ ခေတ်မှီစွာ သူပြောနေတာကတော့ အံ့သြစရာမကောင်းဘူးလား။

နယ်စပ်က ဒုက္ခသည်စခန်းထဲမှာ နေတုန်းက တော်လှန်ရေးသမား၊ သူပုန်တွေက အရမ်းကောင်းတယ်။ ကူညီတယ်။ သစ္စာရှိတယ်ဆိုပြီး ပါးစပ်က တဖွဖွပြောဘူးတဲ့ ကိုမောင်အေးတစ်ယောက် အခုဆိုရင် ကျောင်းသားသူပုန်တွေဟာ အလကားပါကွာ။ လေပဲရှိတယ်ဆိုပြီး ပြောပြန်ပြီ။ တယ်လည်းတက်နိုင်တဲ့လူ။

အခုဆိုရင် ဂျီတော့လည်း ကိုမောင်အေးသုံးနေပြီ။ ဖေ့ဘွတ်စ်ပေါ်မှာလည်း သူ့ ကိုတွေ့ နေရတယ်။ တစ်ခါတလေ ကွန်ပြူတာပျက်နေရင် ကျနော့်ဆီကို လှမ်းပြီးဖုန်းဆက်တယ်။ သနားစရာကောင်းတဲ့မျက်နှာနဲ့ ဖားယားပြီး သူ့ ကွန်ပြူတာ ပျက်နေတာကို ပြင်စေချင်အောင်ပြောရှာတယ်။ သူ့ မိန်းမက ကော်ဖီဖျော်တိုက်တယ်။ သူတို့ လိုချင်ရင် သူတို့ ပေးတဲ့ ဆားဗစ်ကတော့ မဆိုးပါဘူး။ ကျနော်လည်း ပြင်ပေးတယ်။ သူ့ အင်တာနက်ရအောင်ကျနော်ပဲ ဖုန်းဆက်ပြီး လုပ်ပေးတယ်။ ဒီလိုလုပ်ပေးလို့ ကိုမောင်အေးဆီက ပိုက်ဆံမရပါဘူး။ ကျနော်လည်း မလိုချင်ဘူး။ မြန်မာအချင်းချင်း ကူညီရတာပဲ။

ပညာအရည်အချင်းက သုံးလေးတန်းလောက်ပဲ နေဘူးတဲ့ ကိုမောင်တို့ ဇနီးမောင်နှံဟာ အခုဆိုရင် နောက်ဆုံးပေါ်ကားအသစ်ကြီးကို စီးပြီး တောက်ပသစ်လွင်နေတဲ့ အ၀တ်အစားတွေနဲ့ ပျော်ရွှင်နေပါပြီ။ ရန်ကုန်က သူ့ သူငယ်ချင်းတွေ၊ မိဘတွေကို ဂျီတော့နဲ့ ပြောဆိုဆက်သွယ်နိုင်တဲ့အထိတောင် ကိုမောင်အေးတို့ ဇနီးမောင်နှံခေတ်မှီနေပါပြီ။

Samsung Galaxy SII လို့ ခေါ်တဲ့ နောက်ဆုံးပေါ် တယ်လီဖုန်းကို ကိုင်ပြီး၊ သိန်းရာကျော်လွှဲပေးလိုက်ပြီဆိုတဲ့ စကားကိုတောင် သူတို့ ပြောနိုင်ပြီ။

"နိုင်ငံရေးက အလကားပါဗျာ။ ဒီကောင်တွေ အုတ်ပျော်လုပ်တဲ့ဟာကိုများ ခင်ဗျားမို့ လို့ ဝါသနာပါတယ်"

"ဒါကတော့ဗျာ ကိုယ့်တိုင်းပြည်အရေးဆိုတော့ လုပ်ရမှာပေါ့"

"မြောက်ပိုင်းက လူသတ်ပွဲကို ခင်ဗျား ဖတ်မိလား"

ဘီယာသောက်နေရင်းနဲ့ သူ့ အမြင်ကို သိချင်လို့ မေးမိတယ်။ သူက-

"ဖတ်ရတယ်။ မိုးသီးနဲ့ နိုင်အောင်ဆိုတဲ့ကောင်တွေ အာဏာရှုးတွေပါဗျာ။ သူတို့ ကြောင့် သေရတာ"

" အဲလိုလည်း မဟုတ်လောက်ပါဘူး"

"ခင်ဗျားတို့ နိုင်ငံရေးက ရှုပ်ပါတယ်" ကိုမောင်အေးက စိတ်ပျက်တဲ့လေသံနဲ့ ပြောတယ်။

သြစတျေးလျနိုင်ငံမှာ မြန်မာတွေစုပေါင်းပြီး ကထိန်၊ စတိတ်ရှိုး စတဲ့ပွဲလေးတွေကို တစ်ခါတလေ လုပ်ကြတယ်။ သူက ဒီလိုပွဲတော်တွေမှာတော့ သူ့ အရည်အချင်းကို ထုတ်ပြလေ့ရှိတယ်။ အဓိက ဦးဆောင်တဲ့လူလို့ လည်းပြောလို့ ရတယ်။ ကိုမောင်အေးရဲ့ ရောဂါက မိုက်ကိုင်ချင်တဲ့ရောဂါ။ ဘာပဲလုပ်လုပ် သူက နည်းနည်းလောက်တော့ ဆရာကြီးလုပ်ရမှာ ကျေနပ်တယ်။ ဗမာစာတောင် ဖြောင့်အောင်မရေးတက်ပေမဲ့ ဘုန်းကြီးကျောင်းကွန်းစတီကျူးရှင်းကိုလည်း သူဆွဲတယ်။ သူရေးတယ်။ တခါတလေကြရင် နိုင်ငံရေးစတိတ်မန့် တွေတောင် သူရေးတယ်။ အသက်ကလည်းကြီးတော့ လူငယ်တွေက သူ့ ကို လေးလေးစားစားဆက်ဆံတယ်။သူက သူ့ ရွယ်တူ လူကြီးတွေနဲ့ မပေါင်းဘူး။ ပညာတက်တဲ့လူတွေနဲ့ လည်း သူမပေါင်းဘူး။ အဓိပေါင်းတာက လူငယ်တွေနဲ့ ဆိုတော့ သူ့ ရွှီးသမျှ ဖြစ်တာပေါ့။

မြန်မာပြည်မှာရှိတဲ့ အမျိုးတွေ အဆွေတွေကို ဘယ်လိုမျိုးများခေါ်လိုက်မသိဘူး။ အခုဆိုရင် သူ့ အမျိုးတွေက သြစတျေးလျနိုင်ငံမှာ နည်းတာမဟုတ်ဘူး။ ရွာတစ်ရွာတောင် တည်လို့ ရနေပြီ။

အခုဆိုရင် မြန်မာပြည်နိုင်ငံရေးတိုက်ပွဲမှာ သေတဲ့သူ၊ ဒုက္ခတဖြစ်တဲ့သူ၊ ထောင်ကျတဲ့သူ၊ ဘ၀ပျက်တဲ့သူတွေရှိလည်း ကိုမောင်အေးကတော့ အေးဆေးဆေးပါပဲ။ ခေါင်းဆောင်တွေလည်း လက်မှတ်တွေထိုးကြနဲ့ ။ ပြန်ပြီးတည့်ကြနဲ့ ။ ဘယ်သူဘာပဲဖြစ်ဖြစ် ဒီကြားထဲကနေ အမြတ်ထွက်တဲ့ကိုမောင်အေးလို့ ပြောလို့ ရနေပြီ။ နိုင်ငံရေးကြောင့် ကိုမောင်အေး စင်ပေါ်မှာရောက်နေပါပြီ။

ကိုမောင်အေးအမြဲပြောနေကြစကားတစ်ခုရှိတယ်။ ဒါက "ငါ ABSDF ခေါင်းဆောင်အဖြစ် တာဝန်ယူတဲ့အချိန်တုန်းကပေါ့ကွာ..." ဆိုပြီး လူစိမ်းတွေရှေ့ မှာ ဟန်ပါပါနဲ့ ပြောလေ့ရှိတယ်။

တစ်ခါတလေ ကျနော် မှုးလာရင် ကျနော့် မိန်းမကိုဒီလိုပြောတယ်။

"ငါ့အိမ်ကို ဒီလိုကောင်မျိုးတွေ မလာစေနဲ့ "