ပြည်ပအတိုက်အခံတွေအားလုံးအနေနဲ့ တပ်မတော်သားတွေကို အားပေးဖို့လိုအပ်ပါတယ်။ ဘာ့ကြောင့်ဒီလို ပြောရလဲဆိုရင် ပြည်ပအတိုက်အခံတော်တော်များများဟာ ဘက်ပြောင်းလာတဲ့ အရာရှိအရာခံအကြပ်တပ်သားတွေကို ကိုယ်ထိလက်ရောက် အားပေးအားမြှောက်လုပ်တာနည်းလို့ပဲ။ ဥပမာ- ဒုက္ခသည်စခန်းတွေမှာရှိနေတဲ့ တပ်မတော်သားတွေဟာ တတိယနိုင်ငံကိုထွက်လို့မရအောင်လိုဖြစ်နေတယ်။ သြစတျေးလျသံရုံးက စစ်သားဖြစ်တဲ့လူတွေဆိုရင် လက်မခံပါဘူး။ အလားတူအမေရိကန်သံရုံလည်း ဒီအတိုင်းပါပဲ။ ဘာ့ကြောင့် ဖြစ်လဲတော့ မသိဘူး။
ညတုန်းက ဗိုလ်ထက်မင်း(ဖိုးတရုတ်) စည်းလုံးခြင်းရဲ့ အင်အားဝက်ဆိုက်ကို တည်ထောင်သူနဲ့စကားပြောတယ်။ သူ့အပြောအရ ဗိုလ်မှုးအောင်လင်းထွတ်တောင် အမေရိကန်နိုင်ငံမှာ နိုင်ငံရေးခိုလှုံခွင့်အပြည့်မရသေးပါဘူး။ စစ်သားဖြစ်လို့လားမသိဘူး။ ၈၈-တုန်းက ပြည်သူ့ဘက်ကိုပြောင်းလာတဲ့ ဗိုလ်ကြီးစိုင်းဝင်ကျော်ရှိပါတယ်။ အခု အမေရိကန်နိုင်ငံ အင်ဒီယားနားမှာ နေပါတယ်။ သူလည်း အတိုက်အခံအင်အားစုကို တော်တော်လေးနာကျည်းသွားတယ်လို့ကြားရပြန်တယ်။ လက်ရှိအခြေအနေမှာ ပြည်ပမှာနေတဲ့ တပ်မတော်သားအရာရှိ၊ အရာခံ အကြပ်တပ်သားတွေရဲ့ နိုင်ငံရေးလှုံ့ ဆော်မှုက အရမ်းအရေးကြီးနေတယ်။
အထဲက စစ်သားတွေကလည်း ပြည်ပက စစ်သားတွေရဲ့ နိုင်ငံရေးဦးဆောင်မှုကို တောင်းတတယ်။
ဒီလိုအရေးကြီးတဲ့အချိန်မှာ တခါမှ တပ်မတော်သားတွေရဲ့ လုပ်ရပ်ကို ကြိုဆိုဂုဏ်ပြုပါကြောင်း...အကူအညီပေးမယ်ဆိုတဲ့အကြောင်း အတိုက်အခံအင်အားစုက လက်တွေ့ကြကြမလုပ်သေးဘူး။ ကြားလည်းမကြားဘူး။ လက်ရှိရှိနေတဲ့လူတွေကို သံသယတွေစောင့်ကြည့်နေကြတယ် ထင်တယ်။ ဒါက ဘာကိုပြလဲဆိုတော့ စစ်သားတွေကို ကိုယ့်ရဲ့ အင်အားစုတစ်ရပ်မဟုတ်ဘူးဆိုတာကိုပြတယ်။
ကျနော်တို့ သူပုန်တွေဘက်ကို ပြောင်းလာတဲ့ စစ်သားတွေရှိတယ်။ ရေတွက်လို့တောင်မရနိုင်ဘူး။ ဒီလူတွေဟာ လက်ရှိကာလတိုက်ပွဲမှာ အရေးကြီးတဲ့လူတွေလို့မြင်တယ်။ ပြည်တွင်းမှာရှိတဲ့ အပြောင်းအလဲကို လိုချင်တဲ့စစ်သားတွေ အများကြီးရှိတယ်။ အားလုံးသိတဲ့အတိုက်ပဲ...တပ်တွင်းပုန်ကန်မှုဖြစ်နေတာဆက်တိုက်ပဲ။ ဥပမာ တောင်ဥက္ကကလာကတပ်၊ ရခိုင်ဘက်ကတပ်ရင်း၊ ရဲမွန်ဘက်ကတပ်ရင်းတွေဟာ အပြောင်းအလဲလိုချင်လို့ တိုက်နေကြတဲ့တပ်ရင်းဖြစ်တယ်။ ဒါက ထမင်းငတ်လို့ထက် အခြားပုန်ကန်မှုရှိတယ်။ ဒီလူတွေက ကျနော်တို့အင်အားစုတွေပဲ။
တပ်မတော်သားများသို့...
ကျနော်တော့ ခင်ဗျားတို့နဲ့အတူရှိတယ်။ ပြည်သူလူထုအတွက်၊ တိုင်းပြည်အတွက် အမှန်တရားဘက်က ဆက်ပြီးရပ်တည်ကြဖို့ တိုက်တွန်းပါတယ်။ ပြည်ပမှာရှိတဲ့ စစ်မှုထမ်းဟောင်းတွေအားလုံးကို ဖိတ်ခေါ်ပါတယ်။ ကျနော့်လုပ်ချင်တဲ့အလုပ်ရှိပါတယ်။
အားလုံးစုပြီး Network တစ်ခုဖြစ်အောင်လုပ်ချင်တယ်။ စစ်မှုထမ်းဟောင်းအဖွဲ့လိုတော့ မသုံးချင်ဘူး။ ဥပမာ ဗိုလ်မှုးအောင်လင်းထွတ်တို့၊ ဗိုလ်ထက်မင်းတို့၊ ဗိုလ်မှုးစိုင်းသိန်းဝင်းတို့ ဦးဆောင်ပြီးစုစည်းစေချင်ပါတယ်။ ရည်ရွယ်ချက်ကတော့ မြေအောက်တော်လှန်ရေးကို တပ်ထဲမှာလုပ်ဖို့ပါ။ အခုလည်း ကိုယ်လုပ်နိုင်သလောက် လုပ်နေကြတယ်လို့မြင်ပါတယ်။ ရည်ရွယ်ချက်နောက်တခုက ထွက်လာတဲ့စစ်သားတွေ၊ တိုက်နေတဲ့စစ်သားတွေကို စိတ်ပိုင်း၊ ရုပ်ပိုင်းဆိုင်ရာအကူအညီပေးချင်ပါတယ်။ ဥပမာ တတိယနိုင်ငံကိုထွက်လို့မရသေးတဲ့ စစ်သားတွေကို ထွက်လို့ရအောင်ကူညီပေးတဲ့အနေထားဖြစ်ပါတယ်။ ပြည်ပရောက်မျိုးချစ်စစ်သားတွေအများကြီးရှိပါတယ်။ စုစည်းမှုမရှိတော့လို့ ဒီလိုပြောနေရခြင်းဖြစ်ပါတယ်။ ဒီအင်အားစုကို စုစည်းနိုင်မယ်ဆိုရင် တပ်မတစ်ခုတောင် ဖွဲ့လို့ရနိုင်ပါတယ်။ ကျနော်နဲ့ ဗိုလ်ထက်မင်းကတော့ အသင့်ရှိပါတယ်။ ကျန်တဲ့အရာရှိတွေကို ကျနော်ဆက်ပြီးဆက်သွယ်ပါ့မယ်။ ပြီးရင် အားလုံးကိုတင်ပြနိုင်အောင်၊ ချိတ်ဆက်နိုင်အောင် လုပ်ပေးပါ့မယ်။
အတိုက်အခံအင်အားစုများသို့...
ဖြစ်နိုင်ရင် ခင်ဗျားတို့ ကျနော်တို့ကို အားပေးပါ။ စတိတ်မုန့်ထုတ်ပြီးအားပေးလည်း ရပါတယ်။ ကိုယ်ထိလက်ရောက်အားပေးတယ်ဆိုရင် ပိုကောင်းပါတယ်။ စစ်သားတွေက ခင်ဗျားတို့အားပေးမှုကို အရမ်းလိုချင်ပါတယ်။
တချိူ့ အရာရှိတွေ တပ်ကထွက်ပြီး အတိုက်အခံနဲ့ပူးပေါင်းချင်တယ်။ သူတို့ကမေးတယ်။ ခင်ဗျားတို့နဲ့ ပူးပေါင်းရင် ကျနော့်ဘ၀အတွက် ဘာများအာမခံချက်လုပ်ပေးနိုင်မလဲလို့မေးတယ်။ ကျနော်ဘာမှ မပြောနိုင်ဘူး။ ထွက်မလာပါနဲ့လို့ပဲပြောနိုင်တယ်။ သူတို့တွေဟာ ကျနော်တို့ အတိုက်အခံအင်အားစုရဲ့ အားပေးမှု၊ စာနာနားလည်မှုကို အရမ်းတောင့်တတယ်။ ခင်ဗျားတို့ ၀ိုင်းပြီးအားပေးအားမြှောက်လုပ်သင့်တယ်။ ဒါ့ကြောင့် ဒီလိုစာကိုရေးပါတယ်။
အတိုက်အခံအင်အားစုအနေနဲ့ တပ်မတော်သားတွေ အာဏာရှင်ဘက်ကို ပြောင်းဝလှည့်ပါလို့သာပြောတယ်...ကျန်တာဘာမှအားမပေးဘူး။ အားပေးဖို့အတွက်လည်း မကျိုးစားဘူး။ တိုင်းပြည်ပြောင်းလဲဖို့အတွက် တပ်မတော်သားတွေဟာ အဓိကဖြစ်တယ်ဆိုတာ နားမလည်လို့လားမသိဘူး။ ကျနော် ဒီနေရာကနေ အတိုက်အခံအင်အားစုတွေကို မေတ္တာရပ်ခံချင်ပါတယ်။ ၀ိုင်းပြီးအားပေးကြပါ။
1 comment:
can u please explain the meaning of တတိယနိုင်ငံ..?what does it mean?
Post a Comment