ဘုန်းကျော် Group ဖွင့်ပြီ...

Google Groups
Subscribe to phone_kyaw
Email:
Visit this group

1/16/10

ကျနော့်အဖေစစ်သား၊ ချစ်သလားတော့မမေးနဲ့

ဖြစ်ရပ်မှန်တွေဖြစ်ပါတယ်။

ကျနော့်ကိုမွေးတုံးက မင်္ဂလာဒုံက စစ်ဆေးရုံမှာပါ။ အဖေက စစ်လက်နက်ပစ္စည်း လက်အောက်ခံ တပ်ရင်းတခုက ရဲဘော်ပါ။ အခုတော့ တပ်ကြပ်ကြီးတာဝန်နဲ့ ထောင်ကျခံပြီးတပ်ကထွက်လိုက်ပါတယ်။ ထောင်တစ်နှစ်ကျပါတယ်။ စစ်တပ်ထဲမှာ အဖေဟာ နှစ်ပေါင်းသုံးဆယ်နီးပါ အလုပ်လုပ်ခဲ့ပါတယ်။ ကျနော်လည်း အသက် ၁၉-နှစ်ထိ တပ်ထဲမှာကြီးပြင်းခဲ့ရတယ်။ တပ်ကကျွေးတဲ့ထမင်းကိုစားခဲ့တာပေါ့။ တပ်ထဲက ကျောင်းမှာ ၁၀-တန်းအထိကျောင်းတက်ခဲ့ပါတယ်။ အောင်ဆန်းသူရိယလှသောင်းကျောင်းလို့ခေါ်ပါတယ်။ မင်္ဂလာဒုံကပါ။ ဒီကျောင်းက တပ်မိသားစုတွေအတွက်ပါ။ ကျနော်တို့မိသားစုမှာ အဖွားအပါအ၀င်၊ အိမ်ထောင်စုဝင် ခုနှစ်ယောက်ရှိပါတယ်။

ကျနော်တို့စစ်သားသမီးတွေဘယ်လိုနေရလဲ၊ ဘယ်လိုခံစားရလဲ၊ သူတို့ရဲ့ နိုင်ငံရေးအမြင်၊ စိတ်ဝင်စားမှုတွေကို ကျနော်ရင်ဖွင့်ချင်ပါတယ်။ တချို့ အချက်အလက်တွေကို ကာယကံရှင်တွေထောင်ကျမှာစိုးရိမ်တွေအတွက် ချန်ထားပါတယ်။

လွန်ခဲ့တဲ့ ၁၁-နှစ်က ဘ၀အခြေအနေပါ။ အခုထိ ဒီအခြေအနေနဲ့မကွာလှဘူးလို့တပ်ထဲက အမျိုးတွေက ပြောနေတုံးပါ။ အခုကျနော်ပြောမဲ့အခြေအနေက ရန်ကုန်က အထိုင်တပ်ရင်းတခုပါ။ မြန်မာပြည်မှာအကြီးဆုံးပင်မတပ်ရင်းတခုမှာပါ။ သူတို့ပညာသည်တပ်ရင်းတွေတောင် ဒီလိုခံစားရရင်၊ တိုက်ခိုက်ရေးတပ်ရင်းတွေဘယ်လောက်ခံစားရလဲဆိုတာ ကိုယ်ချင်းစာကြအောင်ရေးပါတယ်။ ကျနော့်မိသားစုကတော့ ဒီလိုရေးလို့တော်တော်စိတ်ဆိုးမှာပါ။ ကျနော်ဂရုမစိုက်ပါ။ ကိုယ့်ခံစားချက်နဲ့ကိုယ်ပါ။

ကဲ..ကျနော်တို့ဘ၀ကိုကြည့်ရအောင်။

လိုင်းခန်း

တပ်ထဲမှာ ရဲဘော်တွေအတွက် လိုင်းခန်းရှိတယ်။ အရာရှိတွေအတွက် သီးသန့်လိုင်းခန်းရှိတယ်။ အရာရှိတွေဆိုတာက ဒု-ဗိုလ်ကစလို့၊ တပ်မှုးအထိ ကိုင်ပိုင်ခြံနဲ့ဝင်းနဲ့ ကျယ်ကျယ်ဝန်းဝန်းရှိတဲ့ အိမ်လိုနေရာမျိုးကိုရတယ်။ သက်တောင့်သက်သာရှိတယ်။ ပြဉ်ထောင်အိမ်ပါပဲ။ ကျနော်တို့နေတဲ့လိုင်ခန်းကတော့ ခြောက်ခန်းတွဲလို့ခေါ်တယ်။ ပျဉ်ထောင်အိမ်ပါပဲ။ တစ်ခန်းက စကားပြောရင် တခြားခန်းက ကြားရတယ်။ ကြားမှာ ၆-၁ လို့ခေါ်တဲ့ သစ်သားပြားပဲခြားတယ်။ ရေချိုး၊ ရေခပ်တဲ့နေရာကတော့ ခြောက်ခန်းတွဲလေးတွဲကို ရေအုတ်ခုံတစ်ခုမှာ စုပေါင်းရေချိုးရေခပ်ပေါ့။ တပ်ထဲမှာရေပြတ်တယ်ဆိုတာမရှိသလို၊ မီးလည်းမပြတ်ပါဘူး။ မီးပြတ်ရေပြတ်တာခဏပါ။ ချိုးဖြူရေပိုက်ကရတယ်။ ရေကောင်းရေသန့်လို့ပြောရပါတယ်။ ရေအလျှံအပယ်၊ မီးအလျှံအပယ်ပါပဲ။ ရေခမီးခပေးစရာမလိုဘူး။ ထမင်းဟင်းချက်စားရင် လျှပ်စစ်မီးဖိုနဲ့ချက်လို့ရတယ်။ တခါတလေ တပ်ဘေးက တောထဲမှာ ထင်ခြောက်တွေလိုက်ကောက်၊ အပင်လေးတွေခုတ်ပြီး ထင်းအဖြစ်သုံးကြတယ်။ တပ်ရဲ့  ပတ်ပတ်လည်မှာ တောလေးရှိတယ်။ ချောင်းမြောင်းသေးသေးလေးတွေရှိတယ်။

စားဝတ်နေရေး

တပ်ကပေးတဲ့လစာက အဖေဆိုရင် လစာထုတ်တာနဲ့ ဟိုဖြတ်ဒီဖြတ်၊ တစ်ရက်နှစ်ရက်ဆိုတာနဲ့ကုန်ပီ။ လစာပေးရက်ဆိုရင် တပ်ထိပ်က စားသောက်ဆိုင်မှာ လစာပေးကြရင်း သောက်ကြ၊ စားကြ တပ်မိသားစုတွေ ပျော်ကြတယ်။ ငိုကြတဲ့လူတွေလည်းရှိတယ်။ လစာကို ကြိုတင်ယောကျာ်းရောင်းထားတာ၊ မှီခိုဖြစ်တဲ့ မိန်းမကမသိတော့သူတို့ခလေးတွေကိုကျွေးဖို့မရှိတော့ဘူးဆိုတော့။

တပ်ကစစ်လက်နက်ပစ္စည်းတပ်ထဲက တခုဆိုတော့ သူများတပ်တွေလို အောက်ဆိုက်မရဘူး။ ဥပမာ ထောက်ပံ့နှင့်ပို့ဆောင်ရေးတပ်၊ ဆေးတပ် တို့လိုရဲဘော်တွေဝင်ငွေမကောင်းဘူး။ ဒီတော့ ရဲဘော်တွေလစာနဲ့ဖြစ်သလိုရုန်းကန်ကြတယ်။ မိသားစုများလေပိုဆင်းရဲလေပဲ။ တပ်ထဲက ဆရာကြီးအချို့ နဲ့ အရာရှိတွေလောက်တော့ အဆင်ပြေတယ်။ ဒါပေမဲ့တချို့ အရာရှိတွေဖြစ်တဲ့ လုံခြုံရေးမှုး၊ သင်တန်းမှုးတို့ဆိုရင် တပ်ထောက်ကိုင်တဲ့အရာရှိလောက်အဆင်မပြေတော့ သူတိုမိန်းမတွေလည်း ဟိုပေါင်ရ၊ ဒီပေါင်ရဗျာများကြတယ်။

ရိက္ခာကို အပတ်စဉ်သောကြာနေ့တိုင်းပေးတယ်။ ရိက္ခာမရတာများတယ်။ ဘာဖြစ်လို့လဲဆိုတော့ ရိက္ခာကို ကျနော်တို့အမေတွေက ကြိုတင်ရောင်းရတယ်။ လေးပတ်စာငါးပတ်စာပေါ့။ ရိက္ခာမှာပါတဲ့ပစ္စည်းတွေက ဆန်နှစ်ပြည်၊ ဆီး ၂၅ကျပ်သား၊ သကြားတစ်ပူး၊ နို့ဆီတစ်ပူးလောက်ရတယ်။ တပ်မိသားစုတွေအတွက် (မှီခိုတွေကို) လစဉ်တပ်ကသမ၀ါယမဆိုင်မှာ ဆန်ထုတ်ပေးတယ်။ ဆန်ကအကောင်းဆုံး ငစိန်ဆန်ရတယ်။ တခါတလေအရမ်းဆိုးဝါးတဲ့ဆန်ကိုရတယ်။ မိသားစု ခြောက်ယောက်ဆိုရင် တစ်အိပ်လောက်ရတယ်။

တပ်က ဆန်ကို ထောက်ပံ့နဲ့ပို့ဆောင်ရေးတပ်မှာ သွားထုတ်တဲ့ တစ်ကြပ်ကြီးနဲ့တပ်ရေးဗိုလ်ကြီးတို့စားတာများရင် ဆန်တွေအရမ်းဆိုးဆိုးဝါးဝါးရတယ်။ ထောက်ပို့ဆန်ကောင်းရင်၊ တပ်ထဲကိုအရင်ပြန်မလာဘူး။ မင်္ဂလာဒုံဈေးမှာ ဆန်အကောင်းစားနဲ့အညံ့စားလဲယူတယ်။ လဲခကို ဆိုင်ရှင်ကနေ ရတယ်။ လစဉ်သူတို့အတွက် ကိုက်တော့ တပ်ရေးဗိုလ်ကြီး၊ တပ်ထောက်၊ သမဆိုင်ကိုင်တဲ့လူ၊ ရိက္ခာကိုင်တဲ့လူ၊ လစာကိုင်တဲ့လူတွေက ထောတယ်။ အရာရှိတွေအချင်းချင်းမျှစားတာပေါ့။ တပ်မှုးကို တလကို ပေါ်ဆန်မွေးနှစ်အိတ်လောက်ပို့လိုက်ရင် သူတို့အတွက်ကျန်တာပေါ့။

ကျနော်တို့ဘ၀

အဖေ၀င်ငွေက လစာပဲရှိတယ်။ အလုပ်ကတော့ ကင်းစောင့်(ဂျူတီ) ပဲကြတယ်။ တခါတလေ စတန်းဘိုင်(ဗိုလ်ချုပ်တွေလာရင် လမ်းဘေးကင်းပုန်းဝတ်)လိုက်ရတယ်။ သူတို့အတွက်အဖေက လုံခြုံရေးယူပေးရတာပါ။

ရိက္ခာကလည်းကြိုရောင်း၊ သမဆိုင်ကပေးတဲ့ဆန်ကလည်း တစ်ဝက်လောက်ကြိုရောင်း၊ လစာကလည်းမလောက် ဒီလိုနဲ့ပဲ ကျနော်တို့ရှာစားရတယ်။ မိသားစုလည်းများတော့ ဘယ်လိုမှ စားဝတ်နေရေးမပြေလည်ဘူး။ ဟင်းစားအတွက်ကို တစ်မိသားစုလုံးတပ်ဘေးက ချောင်းတွေ၊ မြောင်တွေမှာရှာစားရတယ်။ ရာသီအလိုက်ပေါ့။ မိုးရာသီဆိုရင် ဘယ်နေရာမျှစ်ရှိတယ်၊ ငါးထွက်တယ်၊ နွေရာသီဆိုရင် ဘယ်နေရာမှာ ပဒက်စာရှိတယ်၊ ဇရစ်ရိုးရှိတယ်၊ ဒါတွေကို ကျနော်တို့စစ်သားသမီးတွေ သိရတယ်။ မသိရင် ငတ်ပြီသာမှတ်။

တပ်ထဲက စစ်သားသမီးကလည်းများတော့ တပ်ဘေးက စားပင်သီးပင်က နလံထူတယ်လို့မရှိဘူး။ ချောင်းထဲမြောင်းထဲကငါးလည်း လုံးဝမခံနိုင်ဘူး။တုန်းတာမြန်တယ်။ ဒီလိုပုံစံနဲ့ပဲ မသေရုံတမယ် မိသားစုတွေကိုကူညီပေးရတယ်။ ကျောင်းပိတ်လို့ စနေတနင်္ဂနွေဆိုရင် တပ်ထဲမှာ တစ်ရက်ကို ၂၀ ရတဲ့နေ့ဝက်အလုပ်ကိုဝင်လုပ်ရတယ်။ တပ်ထဲမှာ မျှက်ရှင်း၊ မြောင်းတူး၊ တပ်မှုးအိမ်ဘေးပေါက်တူးပေါက်ပြီး ၀င်ငွေရှာရတယ်။ အဲတုံးက ဘာမှခံစားချက်မရှိဘူး။ သူတို့ချမ်းသာတာ၊ ထောတာ တရားတယ်လို့ထင်နေတာပေါ့ဗျာ။

ကျောင်းကား

တပ်ထဲမှာ ကျောင်းကားတစ်စီးရှိတယ်။ ကျောင်းသားပေါင်း ၁၀၀ လောက်ကို လှသောင်းကျောင်းကိုပို့ရတယ်။ ရဲဘော်တွေအတွက်ပေါ့။ အရာရှိသားသမီးတွေကြတော့ သူတို့အတွက် သပ်သပ်စီစဉ်ပေးတယ်။ ကိုယ်ပိုင်ကားလိုမျိုး တပ်ကလုပ်ပေးတယ်။ တပ်မှုးကတော့ အရမ်းကောင်းတဲ့ကားနဲ့သူ့သမီးတွေကိုပို့ပေါ့ဗျာ..။ သူ့သမီးတွေကလည်း ရုပ်ဆိုးတဲ့သူများတယ်။ ဒါပေမယ့်လည်း ကျနော်တို့လို စုတ်ပြတ်နေတဲ့ လူတွေကတော့ မင်းသမီးလေးလားပေါ့။ အဲလိုမျိုးဝိုင်းပြီးငန်းရတယ်။ (ဒါက စကားချပ်)

ကျောင်းကားကလူများတော့ ထိုင်စရာနေရာမရှိဘူး။အမြဲတမ်းမတ်တပ်ရပ်လိုက်။ ကျောင်းသားတွေကို ထိန်းတဲ့ MP ဆိုတာရှိတယ်။ ကျနော်တို့ကတော့ သူ့ကို အာဒပီလို့ခေါတယ်။ အဲတုံးက MP ဆိုတာဘာလည်းမသိဘူး။ သူကရဲဘော်အဆင့်။ ကျောင်းကားမောင်းတဲ့သူက ကုန်းဆင်းဆိုရင် ဂီယာထိုးပြီးမဆင်းတော့ဘူး။ တခါတည်းတပ်ထိပ်အရောက် ဖရီးရိုက်ချတယ်။ ဒါမှ သူလည်းမိသားစုအတွက် ကြားပေါက်ရမယ်လေ။

ဆက်ရန်-

No comments:


View My Stats