ဥက္ကဌ ကိုအောင်မိုးဇော်ကို နှစ်ခါပဲ မြင်ဘူးတယ်။ စံခလပူရီမှာတစ်ခါ၊ မဲ့ဆောက်မှာ တစ်ခါ ဖြစ်ပါတယ်။ ဗိုက်ကပူပူ၊ ပါးဖောင်းဖောင်း အရပ်က ဟစ်တလာလောက်ပဲ ရှိတဲ့ ကျနော့် ဥက္ကဌကို ရှိခိုးမတက် အရမ်းလေးစားခဲ့ဘူးတယ်။ တကယ်တော်တဲ့လူလို့ သတ်မှတ်ခဲ့မိတယ်။ အခုတော့ သူဦးဆောင်နေတဲ့ လူ့ဘောင်သစ်ကို လက်ရှိနိုင်ငံရေးကာလမှာ ဘုန်းကျော်ရဲ့ ကျယ်ပြန့်မကြီးကျယ်သော အုံးနှောက်ကိုသုံးပြီး ဝေဖန်ပါအုံးမယ်။ သည်းခံပြီးဖတ်ပါလေ။ အားနေလို့ပဲ ဆိုပါရစေ။
လူ့ ဘောင်သစ်ဟာ တောထဲကို လူအယောက်နှစ်ဆယ်လောက်မပြည့်ပဲနဲ့ ရွှေ့ ခဲ့တယ်။ ဌာနချုပ်ဆိုပါတော့။ အားလုံးက နှစ်ဆယ်ကျော် အရွယ်လူငယ်တွေချည်းပဲ။ တက္ကသိုလ်ကျောင်းသားတွေအများစုပေါ့။ ၂၀၀၁-ခုနှစ်လောက်မှာ ကိုမိုးသီးဇွန်၊ ကိုအောင်သူငြိမ်း၊ ကိုဝင်းနိုင်ဦးတို့ ဦးဆောင်တဲ့ ABSDF နဲ့ လူ့ ဘောင်သစ်ပေါင်းစည်းခဲ့တယ်ပေါ့။ သိပ်မကြာဘူး သူတို့ထွက်သွားခဲ့တယ်။ ဘော,ပဲလို့မပြောယုံတမယ်ပဲ။ လူ့ဘောင်သစ်ဟာ လူ့ဘောင်သစ်မဟုတ်ဘူး။ ကွန်မြူနစ်ပါတီရဲ့ လက်ဝေခံဖြစ်တယ်လို့ သူတို့ဝေဖန်ကြတယ်။ ဒါကတော့ ဟုတ်မဟုတ် လက်တွေ့မြင်ရနေတာပဲ။ ကျနော်လည်းဒီအတိုင်းပဲ ယူဆပါတယ်။ ပြီးတော့ ၂၀၀၄-ခုနှစ်လောက်မှာ ဦးငွေလင်း၊ ကိုယဉ်ထွေး၊ မရီ၊ ကိုတိုးတိုးထွန်းတို့ အဖွဲ့နဲ့ ထပ်ပြီးလူ့ဘောင်သစ်ကိုရောက်လာကြတယ်။ သူတို့က ပြည်တွင်းကနေ လာကြတယ်ပေါ့။ အဲ...အနည်းစုလောက်ပဲ ပါတီဌာနချုပ်မှာ ကျန်ခဲ့တော့တယ်။ အများစုက နိုင်ငံခြားမှာ ရောက်ကုန်ကြပြီ။ ထားတော့ ဒါက ဖြစ်စဉ်အကျဉ်း။
အထွေထွေအတွင်းရေးမှုး ကိုဇော်နိုင်ဦး ရှိစဉ်ကာလပေါ့။ အားလုံးနဲ့တစ်စုတစ်စည်းတည်းဖြစ်အောင် ပေါင်းခဲ့တယ်လို့ ယူဆတဲ့အတွက် အထူးကြိုဆိုခဲ့တယ်။ အားပေးခဲ့တယ်။ လိုက်ပါခဲ့ကြတယ်။ နောက်ပိုင်းကွဲသွားကြတော့ တစ်ယောက်နဲ့တစ်ယောက် သဘောထားတွေကွဲသလိုခံစားကြရပြန်တယ်။ ဒါကလည်း လူနည်းစုဖြစ်တဲ့ ထိပ်ပိုင်းလူသုံးလေးဦးက ချယ်လှယ်တယ်လို့ အခုမှ သဘောပေါက်တယ်။
အခုတော့ ပြည်ပကနေ နဲနဲလောက်တော့ ပြောခွင့်ပြုပါ။ အဓိက ပါတီရဲ့ နိုင်ငံရေးရပ်တည်ချက်နဲ့ လှုပ်ရှားမှုအကြောင်းပဲပေါ့။
လူ့ဘောင်သစ်ဟာ ဒုတိယအင်အားအကြီးဆုံးဖြစ်ခဲ့တယ်လို့ပဲ သိရတယ်။ အခုတော့ ဒုတိယအင်အားအသေးဆုံးပါတီလို့ဆိုပြီး ဝေဖန်တာခံနေရပြီ။ အဓိကတာဝန်ရှိတဲ့သူတွေဖြစ်တဲ့ ဥက္ကဌ ကိုအောင်မိုးဇော်၊ အထွေထွေအတွင်းရေးမှုး ကိုခင်မောင်တင့်၊ တွဲဖက်အတွင်းရေးမှုး ကိုငွေလင်းတို့ အနေနဲ့ ပါတီကို လက်ရှိ ရှိနေတဲ့ ပတ်ဝန်းကျင်ကနေ ဖောက်ထွက်သင့်ပြီလို့ ယူဆလို့ အခုလိုရေးလိုက်တာပါ။ ဒါက ကိုငွေလင်းက ဒေါ်စုကို ဖောက်ထွက်ဆိုလို့ ကျနော်ကလည်း ကိုငွေလင်းနဲ့အဖွဲ့လည်း ဖောက်ထွက်ပါ။
ဘယ်လိုဖောက်ထွက်ရမလဲဆိုတော့ ရှင်းပါတယ်။ လက်ရှိပါတီဟာ ကျနော်လေ့လာရသလောက် နိုင်ငံရေးလောကမှာ ဦးဆောင်မှုမပေးနိုင်သေးပါဘူး။ သူများပြောတဲ့ အတိုင်းလိုက်နေတဲ့အဖွဲ့ငယ်လေးပဲလို့ ထင်ပါတယ်။ ဒါကို ဖောက်ထွက်စေချင်ပါတယ်။ ကိုအောင်မိုးဇော်ဟာ ပါတီဥက္ကဌသာပြောတယ်... ဌာနချုပ်ဖြစ်တဲ့မဲ့ဆောက်မှာ ပုံမှန်ရုံးတက်တာလည်းမရှိဘူး။ ချင်းမိုင်မှာပဲ ထမင်းချက်စားလိုက်၊ ပါတီပွဲပေးလိုက်နဲ့ အချိန်ကုန်နေခဲ့တယ်။ ဟိုသွားအာလိုက်၊ ဒီသွားအာလိုက်နဲ့ အလုပ်ရှုပ်နေခဲ့တယ်။ ကိုခင်မောင်တင့်လည်း တူမောင်ညိုကိစ္စနဲ့ပဲ အလုပ်ရှုပ်နေခဲ့တယ်။ ကိုငွေလင်းလည်း ဂေါ်လီလုံးလောက်ရှိတဲ့ မဲ့ဆောက်ပတ်ဝန်းကျင်က စင်ပေါ်မှာ တက်ပြီးပွားတာလောက်ပဲ တွေ့ဘူးတယ်။ ဆိုတော့ဗျာ ခင်ဗျားတို့ကိုကြည့်ရတာ ပျင်းစရာအရမ်းကောင်းတယ်။ ပြောရရင်တော့ လူစုပြီး ထမင်းချက်စားတဲ့အဆင့်လောက်ပဲ ဖြစ်နေလို့ အခုလိုရေးတာပါ။
ကျနော်တို့ နိုင်ငံခြားကို ပါတီရဲ့ ဆုံးဖြတ်ချက်နဲ့ အားလုံးနီးပါထွက်ခဲ့တယ်။ ယနေ့အချိန်အထိပါတီဌာနချုပ်က ပြည်ပရောက်ရဲဘော်တွေကို ပုံမှန်ဆက်သွယ်တာ၊ သတင်းအချက်အလက်ဖလှယ်ပေးတာ မတွေ့ခဲ့ဘူး။ ပါတီဌာနချုပ်ဘာလုပ်လဲဆိုတာကို ၀က်ဆိုက်ပေါ်တက်ကြည့်တော့လည်း သရဲခြောက်တော့မဲ့အတိုင်းပဲ။ ခြောက်ကပ်နေပြီ။
ပါတီဌာနချုပ်ဟာ ဒီအတိုင်းဆက်သွားရင်တော့ သိတဲ့အတိုင်း ပြည်သူ့ပြည်ချစ်ပါတီလိုဖြစ်တော့မယ်။ အာလုံး လုံးပါးပါးပြီး ကုန်သွားတော့မယ်။ ပါတီဌာနခွဲတွေဖြစ်တဲ့ အမေရိကန်၊ မလေးရှား၊ ဂျပန်၊ နော်ဝေတို့ဟာ ယနေ့အချိန်ထိ သူများတွေနဲ့ ယှဉ်ရင် ဆီနဲ့ရေပဲ။ အားလုံးက အဖိုးကြီးလဥလို ပျော့တီးပျော့ဖက်နဲ့။ အလုပ်လုပ်တာလည်းမတွေ့ရဘူး။ အောင်မြင်မှုလည်းမတွေ့ရဘူး။ ဆိုတော့ ကျနော်တို့ လူ့ဘောင်သစ်ဘာလုပ်မှာလဲ။ ထုံးစံအတိုင်း ဒေါ်စုပြောတဲ့နိုင်ငံရေးလုပ်ငန်းစဉ်ကို ကျနော်တို့ထောက်ခံပါတယ်လို့ ပါးစပ်ကအော်နေမှာလား။
အားလုံးအသက်ဝင်လာဖို့၊ တက်ကြွလာဖို့ဆိုရင် ချင်းမိုင်မှာ တချိန်လုံး မိန်းမဗိုက်ကိုပွတ်နေလို့မရပါဘူး။ မီးဖိုချောင်ထဲမှာ ၀က်သားအချိုချက်ပြီး လာတဲ့မိတ်ဆွေတွေကို ကျွေးနေလို့မရဘူး။ တူမောင်ညိုလို မျက်နှာကြောကြောမာမာနဲ့ သူမှ အတွေးအခေါ်နဲ့အနစ်နာခံလေတယ်ဆိုပြီး ဘ၀င်မြင့်လို့မရဘူး။ နောက်ရှိသေးတယ်။ ဦးငွေလင်းလို အသံအိညောင်အိညောင်နဲ့ တိုးတိုးတိတ်တိတ် နေလို့မရဘူး။ ဒီအတိုင်းဆက်သွားနေရင် မဲ့ဆောက်က ပါတီဝင်တွေဟာ ဒုက္ခရောက်ကုန်တော့မယ်။ ဟိုလည်းသွားမရ၊ ဒီလည်းသွားမရနဲ့။ နိုင်ငံရေးမှာလည်း တိုးမပေါက်။
ပါတီရပ်တည်နေနိုင်အောင် မဲ့ဆောက်မှာ ကျန်ခဲ့တာကိုတော့ ကျေးဇူးတင်တယ်။ သို့သော် ငါ တို့မှ ငါတို့ဆိုတဲ့ အတွေးအခေါ်ကိုတော့ မကြိုက်ဘူး။ ခင်ဗျားတို့နေခဲ့ပါလို့ ပြည်တွင်းပြည်ပက ဘော်ဒါတွေကမတိုက်တွန်းခဲ့ဘူး။ ကိုယ့်ဆုံးဖြတ်ချက်နဲ့ကိုယ်ပဲ။ ဆိုတော့ ကျနော်ကတော့ အခုအချိန်မှာ ပါတီကို လက်ရှိအ၀န်းအ၀ိုင်းကနေ ဖောက်ထွက်စေချင်ပြီ။
လက်ရှိအစိုးရကို နောင်လာမဲ့ရွေးကောက်ပွဲဝင်ဖို့အတွက် ကမ်းလှမ်းစေချင်တယ်။ အဓိက ဒါပဲ။
ခလေးတွေလည်း ကြီးလာပြီ။ ထိုင်းမှာလည်း အိမ်မရှိ၊ ယာမရှိ၊ အလုပ်မရှိနဲ့ ဘ၀တွေဟာ မသေချာ မရေရာဘူး။ နိုင်ငံခြားထွက်ဖို့လည်း အဆင်မပြေ။ ဆိုတော့ ဘာလုပ်မှာလဲ။ ဘယ်တော့ ကျနော်တို့လိုချင်တဲ့ အတိုင်းအတာကိုရောက်မှာလဲ။
ပြည်တွင်းကို ပြန်ပြန်ရင်လည်း ငွေကမရှိ၊ အိမ်ကမရှိ၊ အလုပ်ကမရှိ။ အသစ်ကနေပြန်စရမှာကိုကြောက်လို့ မပြန်ချင်တာလားမသိ။ ဘယ်လိုစဉ်းစားကြလဲမသိတော့ဘူး။
ကျနော်ကတော့ အေးဆေးပဲဗျို့ ။ သြစတျေးလျနိုင်ငံသားအဖြစ်နဲ့ ကမ္ဘာတောင်ပတ်လို့ရနေပြီ။ မဲ့ဆောက်က လူ့ဘောင်သစ်ဌာနချုပ်က လူတွေ...သတိထားကြဗျို့ ။
No comments:
Post a Comment