အပစ်ရပ်စဲရေး ၁၆-နှစ်တာကာလ မှာ တိုင်းရင်းသားလက်နက်ကိုင်အဖွဲ့တွေရဲ့ ဆုံးရှုံးမှု နဲ့ အကျိုးအမြတ်ကဘာလဲ။ သူတို့လိုချင်တောင်းဆိုတဲ့ တောင်းဆိုချက်တွေဖြစ်ခဲ့လား။ ကိုယ်လိုချင်တာမရတဲ့အပြင် ကိုယ့်ရဲ့ အင်အားနဲ့ ညီညွတ်ရေးပဲ ပြိုကွဲခဲ့ပြီ။ စိတ်ဓာတ်တွေပျက်စီးခဲ့ပြီ။ ချမ်းသာတဲ့လူက ချမ်းသာ...ဆင်းရဲပြီး ကောင်းကောက်စရာမရှိတဲ့လူနဲ့..။ ဆိုတော့ နောက်ဆုံးနိဂုံးကတော့ ၁၆-နှစ်တာကာလမှ နအဖပဲအမြတ်ရခဲ့တယ်။ လွန်ခဲ့တဲ့ ၁၆-နှစ်လောက်ကတည်းက အပစ်မရပ်ပဲ ဆက်တိုက်ကြည့်ပါလား။ အနည်းဆုံးတော့ အဖြေတခုတော့ ရနိုင်တယ်။ ဒါပေမဲ့လက်ရှိတွေ့နေရတဲ့ အခြေအနေအရဆိုရင် နအဖက တပန်းသာနေတယ်။
အခု တိုင်းရင်းသားလက်နက်ကိုင်တွေ ဖက်ဒရယ်ကော်မတီလိုမျိုး လုပ်တယ်။ ပူးတွဲစစ်ရေးသဘောတူညီချက်ပေါ့။ ဒါကတော့ တစ်ဦးကိုတိုက်ရင် တစ်ဦးကကူရေးပဲ။ ဒီလိုအခြေအနေဖြစ်လာတာက ရွေးကောက်ပွဲပြီးရင် အပစ်ရပ်တွေကို ပြန်တိုက်မယ်ဆိုတဲ့ အခြေအနေကို ကြောက်လို့ ကျားကန်တဲ့ တုန့်ပြန်မှုတခုပါ။ ဒီအဖွဲ့တွေမှာ ပါတဲ့အဖွဲ့အစည်းတွေက အရင်တုန်းကတည်း DAB မှာ ပါဝင်ပူးတွဲလုပ်ခဲ့ပြီးသားတွေဖြစ်ပါတယ်။
ဖြစ်နိုင်ရင် လက်နက်ကိုင်တပ်ပေါင်းစုဖြစ်တဲ့ DAB က ဟိုးအရင်ကတည်းက ရှိတယ်။ အပစ်ရပ်တော့ DAB မေ့သွားကြတယ်။ တကယ်တန်းတော့ အဲလိုမဖြစ်သင့်ဘူး။ DAB ဆိုတာ တပ်ပေါင်းစုပဲ။ ဒီအေဘီဗဟိုရဲ့ ဆုံးဖြတ်ချက်ကို လိုက်နာပြီး အပစ်ရပ်ရင်လည်း အတူရပ်၊ ချရင်လည်း အတူတူချသင့်တာပေါ့။ ဒါပေမဲ့ မွန်ကတမျိုး၊ ၀ကတဖုံ၊ ကချင်က ဒီလိုနဲ့ဖြစ်ခဲ့လို့ ဒီအေဘီရဲ့ အင်အားနည်းခဲ့တယ်။
ဒီအေဘီဆိုတာ လက်နက်ကိုင်တပ်တွေရဲ့ တပ်ပေါင်းစုပဲ။ ဒီတပ်ပေါင်းစုမှာ တိုင်းရင်းသားလက်နက်ကိုင်တပ်တွေအားလုံးပါဝင်သင့်တယ်။ အထူးသဖြင့် သူပုန်အဖွဲ့တွေအားလုံးပါဝင်သင့်တယ်။ အားလုံးက တစ်သံတည်း အပစ်ရပ်မယ်ဆိုလည်း အားလုံးလုပ်၊ မလုပ်ဘူးဆိုလည်းအားလုံးတိုက်ဆိုတဲ့ သဘောထားတော့ရှိရမယ်။ အခုတော့ အဲလိုမရှိခဲ့လို့ ကိုယ့်အင်အားတွေပြိုခဲ့ရတယ်။ ရန်သူပဲ နိုင်ခဲ့တယ်။
ဒီတစ်ခါတော့ ရှေးက သင်ခန်းစာကိုယူပြီး ပြတ်ပြတ်သားသားလုပ်သင့်ပြီ။ ဒါတော့ အထက်ကပြောသလို အားလုံးပါဝင်၊ အားလုံးသဘောတူ၊ အတူတူလုပ်၊ အတူတူအကျိုးခံစားခွင့်ရှိရေးပဲ။ ကျနော်တို့လိုချင်တာက ငြိမ်းချမ်းတဲ့ဖက်ဒရယ်ပြည်ထောင်စုပဲ။ ဟိုတစ်ဖွဲ့ကအပစ်ရပ်၊ ဒီအဖွဲ့ကတိုက်လုပ်နေတဲ့ခေတ်က ကုန်ပြီ။ တိုက်ရင်အတူတူတိုက်၊ သေလည်းအတူတူသေတာအကောင်းဆုံးပဲ။
ကနေ့မှာ အကယ်လို့စစ်အစိုးရက တိုက်မယ်ဆိုတဲ့ သံသယနဲ့မစောင့်နေနဲ့ တော့။ စစ်အစိုးရက တိုက်တိုက်မတိုက်တိုက် ပြန်ချရမဲ့အချိန်ရောက်နေပြီ။
နောင်တချိန်မှာ အားလုံးပါဝင်နိုင်တဲ့တပ်ပေါင်းစုကနေ အသံတစ်သံတည်းနဲ့အတူတူလက်တွဲပြီး ကိုယ်လိုချင်တဲ့ပန်းတိုင်ကို ချီတက်ရတော့မယ်။ ဒါကတော့ တိုင်းရင်းသာလက်နက်ကိုင်တပ်တွေ သူတစ်လူငါတစ်မင်း မလုပ်ဖို့ပဲ။
No comments:
Post a Comment